شايب يرقد في بجامه

بسم الله الرحمن الرحيم
السلام عليكم ورحمة الله وبركاته
هذه قصيده للشاعر ابو بكر رابح المغربى
شايب يرقد في بجامه.. مايرقد في جلابيه
جوه في دارا حمامه.. متمنقه ميه ف الميه
يلبس ع الموضا هندامه.. ولبساتا ديما رسميه
ومنظم ساعات طعامه.. وأغلب وجباتا مشويه
روتيني داير نظامه.. يشرب قهوه كل عشيه
عندا فتره لنسيجامه.. عايش عيشا رومانسيه
كناري يغرد قدامه.. نغمت صوتا موسيقيه
داير حوض أسماك أحجامه..يختلفن بألوان بهيه
شايب عاش دلال أيامه.. مافي عمرا دار قضيه
مابين أوراقا وأقلامه.. مثقف و أفكارا حيه
فندام إيتابع ف افلامه..و يحكي لغات أجنبيه
فارض ع الناس إحترامه.. واخذ لأمور إبجديه
هادي فى طبعا وكلامه.. مايعرفش العصبيه
مؤدب في رد سلامه.. تابع قول الله ونبيه
لاهو من ناس الجلهامه.. لاهو من ناس الحسديه
لاهو كيف أولاد عمامه.. قلت دين ومشكلجيه
لا يعرف زرع ولاجلامه.. لا يعرف عيت إم حويه
جاه إمراجع بو نجامه.. بن عمه من نفس الفيه
قاله راهو في خصامه .. في جيهت لأرض الفوقيه
فيها كانت فيه علامه.. لكن من مده مخفيه
هلي من عند الخرامه.. لاعند القاره لكصيه
من غربي وادي النعامه.. من شرقي مقلب لميه
من عند علاوي الحمامه.. لا عند قرارات هنيه
راهم جوها عيت سلامه.. ونحنا بتنا برانيه
يحكي ويقّبع فى أكمامه.. حردت سوريتا ملويه
من ع الراس عزق لعمامه.. طلع من جيبا كميه
وخذت الأرض عليك ندامه.. ياعار العيله جمليه
نبوا يوم إيحيد غمامه.. نرجوا فيه الكبانيه
شال الشايب فى دوامه.. قاله فز أنعدو هيه
في التيوتا حط إخيامه.. هايلوكس أو فيها بتيه
خبزه وأشولات أقطامه.. و أجريوين أمعا عجميه
قبل الليل إيعم ظلامه.. وصلوا لأرض هللي مغزيه
كم واحت واتي بحزامه.. داير في جنبا غدريه
يبوا لزة عيت سلامه.. قبل الفجر إيعلم ضيه
تما الشايب فى دوامه.. في الجيه ماعندا نيه
تمت قداما التوامه..طلق إصناب و جطلاويه
ليله كي حلم الجثامه.. كم جثه تمت مرميه
ليله فيها عيت سلامه.. دالو الأرض إبعين قويه
خلوا عيلة بو نجامه.. يجاروا فى هالحطيه
لزوهم تما إيتحامه.. شايبنا بالشماسيه
نين إغلب فى شيل أقدامه.. عارف روحه راح ضحيه
جاه واحد شين إنتقامه..قاسي ماعندا حنيه
متعضد يا فيه جهامه.. يقتل لو قوى بونيه
ضاع الشايب هو وأحلامه.. حصل دهكا في جوجيه
طاح إيعيط من صمامه.. فاقد وعيا تم رميه
سبحانا ربي وأقسامه.. ماينجا لولا رعويه
لقيوه إيشير بأبهامه.. يطلب فى نجده فوريه
فى المستشفى كان إختامه.. مايوعى للي طرحيه
ما نجّين من الكسر إعضامه..دارولا كم عمليه
قررلا الطبيب إقامه.. لا جل شالو منا ريه
تبع رايات الهدامه.. غروا بيه إنسي ماضيه