احكي ياقلبي لاتجحد احكي واجد علي غية عين الشارد

بسم الله الرحمن الرحيم
السلام عليكم ورحمة الله وبركاته
احكي ياقلبي لاتجحد احكي واجد علي غية عين الشارد
احكي ياعقلي جيب بيان عللي صار فراقه في عز المشوار
مبكي عيني ليل نهار وما ترقد النوم جفل منها باعد
وكان خطر سافي الجرجار يجي منهد الدمع بطوفانه ع الخد
غلاه احصل دونه نقار جيوش حشد علي غيتنا متعند
حشد لي دبابات اكبار ولا كي مد علي ساس الغيات انهد
احكي ياعقلي جيب علل بمو حاصل مع غية عين الجافل
اللي من حبه مذيبل اليوم جحد غلاي وبدياره باعد
وما نحسبشي في لول يجي موعد يخون غلاي ويسقد
لقيت روحي ياخوي هبل ونا نمورّد نذري في عون مخمّد
احكي ياقلبي جيب خبر بموساير معا غية عين الجاسر
الغالي مولى الدور ايكر بعد ينكد يجي فوق الجوجي منهد
جبينه ضاوي كي القمر اوفي العدد اطناشر ليله متصاعد
زرنّي فيها اوشام خضر وكلا الخد ثريا في العالي توقد
غزال اريل هامل في بر استاحش رد جفل شور الدفه عاود
عليا لاماه استاعر دعا من جد الله يخرب بيت الحاسد
احكي ياعقلي جيب نباه نظيف عضاه اللي ناسيه ودرّت عزاه
شقينا واجد في سباه غلاه انعد ماصار ولا كان الود
نعده بابور علي ماه ومزوّد اموال معبي ملا حد
علي مالح ماشي بوتاه ومسقد حديث الصنعه ماله رد
ركب في ديموم بعد جاه الموج صعد مع اركانه تم ايبدد
غرق في ساعه حول الله غطس باعد شظايا ف الديموم قعد
تريس يهني ضاع معاه وما انتجد عليه اسراب الحوت انهد
هضا كي مولى الدور سفاه اللي باعد مثيله بالمزبوط نعد
احكي ياعقلي جيب بيان علي هان حبيبي بو سالف ريان
نعدا توه ياحبان اركيب مد كنس ما منه حاجه رد
نعدوه مطيرة غيطان عليها انهد شبوب ببارق فيه رعد
يزهي كيف عليك يبان نما واشتد سبل مفرق م الريح رقد
خذوا رغاطه م الجيران وكيف حصد التم بقي مجرن واحد
علي ريحه لمو رعيان وفيه ولد يعوّل في نار ي يوقد
بعد طار طشاش النيران الله رايد بنار علي زرع مشريد
حرق تم رماد ودخان وفوق صعد سحابه والقبلي ساعد
هضا كي بوسالف ريان حجر وحسد عليا ماكيفه ناجد
احكي ياقلبي لاتجحد احكي واجد علي غية عين الشارد